‘जयदीप बगवाडकर’ च्या ‘वारी नाही रे’ या गाण्याला उत्तम प्रतिसाद

संगीत क्षेत्रात कायम नाविन्यपूर्ण प्रयोग करणारा प्रसिद्ध आणि आपल्या आवडता गायक ‘जयदीप बगवाडकर’नं आषाढी एकादशीचं औचित्य साधत ‘वारी नाही रे’ या गाण्यामार्फत विठुरायाला भावनिक साद घातली आहे. खरं तर कोरोना व्हायरसच्या प्रादुर्भावामुळे यंदाही वारीचे आयोजन साध्या पद्धतीने करण्यात आले होते. त्यामुळे अनेक वारीला जाणा-या भक्तांचा हिरमोड झाला आहे. आपल्या लाडक्या विठुरायाला भेटायला प्रत्येक भक्ताचं मन आतुर झाल असत. परंतु वाढत्या कोरोना संसर्गामुळे यंदाही वारी झाली नाही. ‘अक्षरा क्रिएशन्स’ निर्मित या गाण्याचे सुंदर बोल प्रसिद्ध गीतकार ‘अश्विनी शेंडे’ हीने लिहीले आहेत. या गाण्याचे मनमोहक संगीत ‘श्रेयस जोशी’ आणि संगीत संयोजन ‘प्रणव हरिदास’ यांनी केले आहे.

आजवर जयदीपने मराठी आणि हिंदी भाषेत अनेक सुप्रसिद्ध गाणी गायली आहेत. तसेच त्याने अनेक रिॲलिटी शोज सुद्धा केलेले आहेत. संगीत क्षेत्रातील नामांकित दिग्गज, गायिका श्रेया घोषाल, वैशाली सामंत, बेला शेंडे तसेच गायक अवधूत गुप्ते यांच्यासोबत अनेक सुप्रसिद्ध स्टेज शोज केले आहेत. तसेच ‘मुंबई – पुणे – मुंबई ३’ या सिनेमातील प्रसिद्ध गाणं ‘कुणी येणारं गं’ हे गाणे त्यांनी गायले आहे.

गायक जयदीप बगवाडकर ‘वारी नाही रे’ या गाण्याविषयी म्हणाले, ”एखादी चाल जेव्हा मनाला भिडते, तेव्हा आतून काहीतरी जाणवतं, तेच “वारी नाही रे” हे गाणं पहिल्यांदा ऐकल्यावर मला झालं. अश्विनी शेंडे हिने त्यावर सुरेख आणि सुंदर शब्दांचा साज चढवला आणि गाणं पूर्णत्वाला आलं. तसेच या गाण्याला संगीतकार श्रेयस जोशी याची अजोड आणि उत्कृष्ट साथ लाभली. गाणं गाताना समोर फक्त वारी दिसत होती असे ते म्हणाले. मोकळे रस्ते, धुसरसा पाऊस आणि सा-यांच्या मुखात माऊली नाम. एक अत्यंत खोल आणि सुंदर अनुभव होता आणि नेहमी प्रमाणे विठ्ठलाने तो माझ्याकडून पूर्ण करून घेतला. मनात खूप समाधान आहे, व त्याहीपेक्षा वारी पुन्हा कधी होणार हा प्रश्न सुद्धा मनाला खूप भेडसावत आहे. पांडुरंगा चरणी एकच प्रार्थना पुढच्या वर्षी तरी वारी व्हावी.”अशीच माझी प्रार्थना.